دولة الرئيس نبيه بري رئيس مجلس النواب،
دولة الرئيس حسان دياب رئيس الحكومة،
حضرات النواب والوزراء
اليوم واكتر من أيا يوم مرق عا لبنان، نحنا بظرف استثنائي وداهم بيستدعي توحيد الجهود وضم كل الأيادي لأنو نحنا مؤتمنين عا وطن كتير غالي وشعب أغلى بكتير ،وبذكر الكل انو نحنا موجودين لخدمة الشعب وخدمة الوطن
على علم الجميع كتلة نواب الأرمن سهلت بالفعل ومش بالقول تشكيل هذه الحكومة لأنها حاجة ملحة بهل الظرف الاستثنائي للبلد والبلد اهم من تحاصص الحقايب والوزارات.
خللوني ضيف انو نحنا اليوم ككتلة نواب الارمن مقسومين، روحنا مع الناس الموجوعة يللي نزلت عالطرقات تا تعبر عن وجع حقيقي وصادق لكن عقلنا وقلبنا مع الوطن والخوف على مؤسساتو.
اليوم نحنا مدعوين لاتخاذ قرار حازم وحاسم بالنهوض بالبلد من أول وجديد تاركين ورانا كل كلام متخاذل ومحبط للعزيمة لأنو هلق الوقت بيتطلب عمل جدي ليل نهار، عمل وشغل وتعب دون ممحاكات لأنو الوقت عم يداهمنا والتداعيات على الناس والاقتصاد كل مالها عم تكبر ونحنا لازم نكون خط الدفاع الأول عن الشعب.
مسؤوليتنا اليوم بتحتم علينا نواجه كل التحديات بصبر وعزيمة تا نقدر ننصف الشعب وصوت المطالب المحقة يللي هي مطلب كل لبناني تا نوصل عا بر الأمان ونحافظ على ثقة شعبنا بالوطن.
المطلوب هوي انو نكون عا قد المستوى المطلوب، المطلوب هو محاربة حيتان المال يللي نهبوا الدولة وقدرات الوطن ونعيد للبنان أموالو أينما كانت، ومشان هيك لازم نكثف الجهود ونترفع عن كل شي ونضحي تا نخلص الوطن من طاغوت ناهبي الأموال وحيتان المال يللي ربحوا كتير من الوطن.
اليوم واكتر من أيا يوم لازم نحط كل خلافاتنا عا جنب ونشتغل ضعف جهودنا كرمال ننقذ الوطن بتشريعاتنا وبالتنفيذ لتمكين الوطن من استعادة عزو.
اليوم نحنا لازم نشتغل على حماية الدولة من خلال إعادة هيكلة الدين العام وتجميد استحقاق اليوروبوند والتفاوض مع الجهات المعنية لتأجيل الاستحقاق واليوروبوند مش اهم من الشعب .
هالحكومة مش بس لازم تكون حكومة مواجهة التحديات بل لازم تكون حكومة عدم الاستسلام ،الهدف الأساسي والوحيد لازم يكون انقاذ البلد واحقاق الحق للشعب الموجوع والمنتفض على الفساد والسرقة.
دولة الرئيس الثوار الحقيقين لا اجنده لهم إلا خلاص الوطن ونحنا على يقين انن مستعدين يعطوا من خبراتن ووقتن لانقاذ الوطن ولازم هالحكومة تتعاون معهن
المطلوب من هيدي الحكومة هو دعم الشباب اللبناني عبر استقطاب فرص العمل والمستثمرين واعطاء حوافز وضخ دم جديد بالإدارات واعادة هيكلة الإدارة على اسس المكننة والرجوع عن التوظيف غير القانوني يلي تم من بعد إقرار سلسلة الرتب والرواتب وهيدا الموضوع ضرورة قصوى، نحنا هدفنا اعلاء قدرات الشباب وفتح الطريق امامهم للوصول الى مراتب أعلى بوطن افضل وبظروف افضل بكتير من يللي عم نعيشها، الشباب اللبناني هو أملنا وديمومة الوطن وعلينا دعمو الى اقصى الحدود بالتضحية وبالجهود القصوى.
هيدي الحكومة لازم تكون حكومة محاربة الفساد والهدر لخلق بيئة افضل بيكبروا ولادنا فيها، فلتكن حكومة عمل وتضحية واجتهاد وثبات بكل قرار ، حكومة شفافة ومنصفة بتتضامن بعملها مع الشعب ومطالب الشعب الثائر، وبإسم كتلتي منعطي الثقة لمباشرة العمل لحكومة مواجهة التحديات وعلى الحكومة أن تكسب ثقة الشعب ومنضم كل جهودنا معها ومنقاوم كل شعور بالإستسلام للوصول بلبنان الى بر الأمان.
